Ghar Baithe Apne Dost Ka Computer Kaise Chalaye

Kuch saal pahle tak ye kisne socha tha ki hum ek computer se dusre computer ko Access kar sakte hai, lekin aaj ke time me ye possible hai. Aap apne computer se kisi dusre computer ko remotely access or control kar sakte ho. Ab wo dusra computer chahe aapke computer ke paas ho, 1 km ki duri par ho, 100 km ki duri par ho ya fir dusre desh me hi kyu na ho. lekin iske liye dono compter/laptop me ek software install hona chahiye jiska naam hai TeamViewer.

Teamviewer ke jariye aap kisi bhi city or country me rahne wale logo ke computer ko chala sakte ho ya fir khud ke computer ko kisi aur ko access karne ki permission de sakte ho.

Ek Computer Se Dusre Computer Ko Remotely Access Kaise Kare

Internet par teamviewer ke Alawa bhi kai sare free software available hai jinki madad se aap ek computer se dusre computer ko remotely access kar sakte ho. jaise ki AnyDesk, WebEx, Ammyy Adminn, Ultra VNC etc. lekin yaha par mai aapko Teamviewer ke through ek computer ko dusre computer se access karne ka tarika bataunga.

shayad aap ye soch rahe honge ki mai apne computer ko kisi aur ke computer se kyu connect karu? kisi aur ke computer ko kyu chalau ya fir kisi aur ko apna computer kyu chalane du ? kya fayda milega aisa karne se?

Arrey janab fayde to bahut hai, chaliye mai aapko kuch fayde ginwa deta hu-

Ek Computer Se Dusre Computer Ko Access Karne Ke Kya Fayde Hai?

Kisi Aur Ke Computer Ko Apne Computer Se Connect Kyu Kare?

har kisi ki apni alag-alag jarurat hoti hai so wo apne hisab se teamviewer ya fir other remote access software ka istemal kar ke another computer ko operate karte hai aur apni jarurato ko pura karte hai.

mai sabse pahle apna hi example dekar samjhane ki kosish karunga ki maine is software ka istemal first time kab aur kyu kiya tha. i hope ki is example ko read karne ke baad aapke sare doubts clear ho jayenge ki akhir 2 computer ko teamviewer se connect kyu kare aur isse kya fayda hoga.

Maine TeamViewer Ka istemal Kis liye Kiya?

is software ka istemal maine online seo aur wordpress seekhne ke liye kiya tha. kyu ki mai jis bande se ye sab seekh raha tha wo delhi me rahte hai aur mai allahabad me. so itne dur rah kar bhi sikhne aur sikhane ka jo madhyam tha to wo tha teamviewer.

jab bhi mujhe kuch sikhna rehta tha to hum dono ek dusre ke computer ko teamviewer ke through connect kar lete the. isse mere computer ki screen unke computer par show hoti thi jisse ki wo mere computer par jo kuch bhi kar ke dikhate ya samjhate the wo sab mere computer screen par bhi show hota tha.

kabhi-kabhi to mai unke computer ko access karta tha jisse ki wo apne computer par jo kuch bhi kar ke bataye wo mere computer screen par show ho aur use dekh kar mai kuch seekh saku. to is tarah se maine online seo aur wordpress ke bare me jana aur isme sabse aham role nibhaya teamviewer ne.

kyu ki yahi ek software tha jiske jariye maine seo aur wordpress ke bare me jana aur wo bhi delhi se dur rah kar.

to friends, ye to thi meri story teamviewer use karne ki  🙂 Aaiye ab kuch aur fayde jaan lete hai teamviewer software ki.

Teamviewer Se Another Computer Ko Operate Karne Ke Fayde

1- is software ka istemal Professional log zyada karte hai, jaise ki agar kisi ko apne team members ke sath koi jankari share karni ho, unhe kuch batana ho to aise me ye jaruri nahi ki wo insan unke sath rahe ya unke samne bataye. teamviewer ki madad se dusre computer ko access kar ke wo apne ghar se hi bata sakte hai.

2- suppose ki aapke dost ke computer me koi setting wagaira karni hai jo ki aapko acche se aati hai to fir iske liye aapko apne dost ke ghar jane ki jarurat nahi hai. dost ke computer ko remotely access kar ke sari setting wagaira kar ke dikha sakte hai.

3- maan lijiye ki aap office me ho aur ghar ke computer me koi jaruri file rakhi hai jiski aapko urgently jarurat hai to aise me aap ghar ke computer ko teamviewer ki help se connect kar ke sabhi jaruri files apne computer me transfer kar sakte ho.

4- kuch sikhne ya sikhane ke liye ye software best hai. kyu ki iski madad se hum kahi bhi rahe kisi ke bhi computer ko access kar sakte hai.

5- ek computer ka data kisi dusre computer me transfer karne ke liye aap kya karte ho? pen drive, hard drive ka use? lekin yahi computer kaafi duri par ho aur aap us computer me koi file send karna chahte ho to? is situation me bhi aap teamviewer ki madad le sakte ho. kyu ki teamviewer me remote control ke sath-sath file transfer karne ka bhi option available hai.

to friends, ye to kuch fayde hain jo maine aapko yaha par bataye. i hope ki aap acche se samajh gaye honge. chaliye ab zyada time na lete huye ye jaan lete hai ki ek computer se dusre computer ko remotely access/operate/control kaise karte hai.

TeamViewer Ki Help Se Another Computer Ko Kaise Chalaye

ek computer se Dusre computer ko chalane ke liye dono computer me Teamviewer software install hona chahiye aur internet connection ka hona jaruri hai. mai yaha par aapko, dost ke computer ko kaise operate kar sakte hai ka example dekar samjhane ki kosish karunga. agar aap ye proces samajh lete ho to fir aap kisi ke bhi PC ko chala sakte ho. to chaliye shuru karte hai-

Step 1- Sabse pahle to aap neeche diye gaye link par click kar ke Teamviewer software download kar ke install kar lijiye. (dusre computer me bhi same yahi process apnana hai)

Download TeamViewer

important note for software installation

jab aap teamviewer software download karne ke baad install karenge to-

1- How do you want to proceed me Basic installation select karna hai.

2- How do you want to use Teamviewer me Personal/Non Commercial Use ko Select karna hai.

3- Dono computer me same version ka teamviewer download kare nahi to connecting me problem aa sakti hai.

Step 2- Ab Teamviewer ko open kariye. jab aap teamviewer ko apne computer me open karenge to aapke samne kuch is tarah se image show hoga jisme aapke Teamviewer ki ID aur Password show hogi.

open teamviewer software on your pc

same isi tarah Aapke dost ke computer me bhi teamviewer ID aur Password show hogi jo ki aapki ID aur Password se bilkul alag hogi.

Step 3- Agar aap apne dost ke computer ko access karna chahte hai ya chalana chahte hai to iske liye aap apne dost se call ya message kar ke uske teamviewer ki ID aur Password pata kar lijiye.

Note- Teamviewer ID to same rahti hai  but password har time change hota rahta hai. so aap ye bilkul bhi na soche ki ek bar aapki id aur password kisi ko pata chal jaye to koi bhi aapke computer ko access kar sakta hai.

Ab apne computer me open teamviewer ke Control Remote Computer section me Partner ID yani ki dost ke teamviewer ki ID enter kariye aur Connect to partner par click kar dijiye.

enter partner id and connect

Step 4- Ab aapse Password enter karne ko kaha jayega jisme aapko dost ke teamviewer ka password enter karna hai.

teamviewer authentication

Password enter karne ke baad Log On par click kar dijiye.

 Log On par click karte hi aapka computer aapke dost ke computer se connect ho jayega aur aapke computer screen par aapke dost ka computer show hoga. kuch is tarah se-

your friend's computer remotely control by you

Congrats ! ab aap apne friend ke computer ko apne computer Laptop se chala sakte ho.

same yahi process kar ke aapka dost aapke computer ko access kar sakega. jiske liye aapko apne teamviewer ka ID aur Password apne dost ko batana hoga. 

Last word

Agar aap kisi aur ke computer ko access nahi karna chahte ho fir bhi aap is software ka istemal file transfer karne ke liye kar sakte ho. kyu ki gmail, whatsapp wagaira par file send karne ki limit hoti hai but teamviewer par aisa nahi hai. aap kisi bhi tarah ka data or file iski madad se send kar sakte ho.

Read Also

Jankari acchi lage to share jarur kare Aur Agar Koi Question Ho to Comment Kariye.

Comments (18)

Leave a Reply

Your email address will not be published. Required fields are marked *

6 Shares
Share6
Tweet
+1
Share
Pin